Ljósi punkturinn

Nokkrar nýjar síður

2007-12-06T13:39:00.001Z

Fleiri jólakort

2007-11-12T16:32:00.001Z

Jólakortin

2007-11-12T15:27:00.000Z

Þá er ég byrjuð á jólakortunum.

Hæ aftur

2007-10-26T11:29:00.000Z

Búin að vera í dágóðu fríi. Ekki mikið búin að vera að föndra né neitt annað. Gigtin að plaga mig þannig að ég hef eiginlega ekki gert neitt nema hugsa um mig og strákinn minn og svo hvíla mig þegar Kiddi er heima. Nú er þetta hinsvegar allt að koma , búin að fara á einn skrapphitting og er á leiðinni á jólakortahitting á laugardaginn ( jamm þið heyrðuð rétt jólakortahitting ).
Búin að gera nokkur kort bæði saumuð og skröppuð og er að senda frá mér bunka af afmæliskortum sem ég hef verið að trassa að gera ( einfaldlega ekki komið mér í þetta og svo gleymt þeim inn á milli, hendurnar bólgnar og þá geri ég ekki neitt og þegar góðir dagar koma þá er þetta ekki efst í kollinum mínum ).

Fyrsta baðið

2007-08-16T12:33:00.000Z

Hér er síða um fyrsta baðið hans Víkings Atla. Myndin er reyndar tekin þegar hann fór í bað nr. 2 en ég setti hann í fyrsta baðið. Myndirnar af því hafa glatast því miður en við tókum það upp á myndband. Vonandi er það til enn.

Blái pp með baðinu er frá Carol wilson og mig minnir að ég hafi fengið hann í Föndru.
Hvíti pp fékk ég í föndurbúð í múlunum.
Dökk blái og munstraði pp er frá chatterbox.
Fyrirsögnin er gerð með sizzixstöfum.
Myndin er tekin 18. september 2006 en þá var hann tæplega mánaðargamall.

Mömmustrákur

2007-08-10T17:04:00.000Z

Litli mömmustrákurinn minn. Hérna er hann nýkominn úr baði og kominn í náttfötin sín með þessa sætu nátthúfu :) Algjör rúsína.

Munstraði pp og sá brúni ( undir myndinni ) er frá American Craft.
Olívugræni pp er frá Bazil sem og pp sem ég notaði í hjörtun.
Hjörtun eru gerð eftir cb frá Fancy Pants.
Blómið átti ég , minnir að að sé gerviblóm úr Europris.
Borðin keypti ég í saumnálinni í Kópavogi
Titillinn er sizzixstafir, grafiti
Litlu blómin eru cuttlebugmót sem ég nota í sizzixið mitt.

Tiltekt og veikindi

2007-08-08T15:32:00.000Z

Jebb enn á ný er ég veik. Frekar ömurlegt en þetta hlýtur að líða hjá eins og allt annað :) Held allavegana í vonina um það.

Meðan ég er svona slöpp og lasin þá henti ég inn öllum þessum uppskriftum sem eru hér fyrir neðan. Langar svo að skrappa en hef hreinlega ekki orkuna í það. Sem betur fer er Kiddi heima í fæðingarorlofi þannig að ég get leyft mér að liggja eins og skata og taka því rólega.

Frönsk Súkkulaðiterta

2007-08-08T15:20:00.000Z

Hráefni:

150g smjör
150g Cote d'Or súkkulaði (56%)
165g Sykur ( 2 dl )
4 eggjarauður
4 eggjahvítur
80g hveiti ( 1,5 dl )

Aðferð :

Hitið ofninn í 175°C.
Stífþeytið eggjahvíturnar.
Smyrjið smelluform (22 cm ) að innan með smjöri, stráið síðan hveiti yfir það.
Bræðið 150g af súkkulaði, hrærið saman við smjör og sykur þar til það verður ljóst og létt.
Blandið eggjarauðunum saman við einni í einu og hrærið vel á milli þeirra.
Blandið saman bræddu súkkulaði og hveiti saman.
Blandið síðan eggjahvítunum varlega saman við.
Bakið í 30-35 mín við 175°C og kælið kökuna ( á að vera blaut inní).

Krem

Hráefni :

200g Cote d'Or súkkulaði (56%)
4 msk smjör
1 msk Grand Marnier
1,5 dl ristaðar möndluflögur eða heslihnetuflögur

Aðferð :

Hitið saman smjör, súkkulaði og Grand Marnier og smyrjið því á kökuna.
Fallegt er að skreyta kant kökunnar með ristuðum heslihnetuflögum eða möndluflögum.
Berið kökuna fram með þeyttum rjóma eða vanilluís.
Verði ykkur að góðu :)

Grænmetislasanga

2007-08-08T15:18:00.000Z

Tómatpastasósa

Hráefni :

1 dós niðursoðnir tómatar
Slatti af hvítlauk
Ítölsk pottagaldrablanda

Tómatpastasósa

Aðferð :

Blanda þessu saman

Hvít sósa

Hráefni :

1 dós kotasæla eða rjómaostur eða hvort tveggja 50 / 50

Hvít sósa

Aðferð :

Blanda saman

Taka það grænmeti sem á að fara í lasagna og létt steikja það , ef kartöflur, brokkóli eða blómkál fer í réttinn þá á að sjóða það í smá stund.

Blandar tómatpastasósunni yfir grænmetið.

Síðan er tómatpastasósunni og hvítu sósunni sett inn á milli laga af lasagnaplötum í eldfast mót.

Þetta er sett inn í ofn og hitað þar til það er fulleldað.

Linsu lasagne

2007-08-08T15:17:00.000Z

Rauð sósa

Hráefni :

2-3 gulir laukar
3-4 gulrætur
2-3 hvítlauksrif
2 dl rauðar linsur
2-3 dl vatn
1 dós skornir tómatar
1 dós tomato sauce
5-6 msk. tomato pure
1 grænmetisteningar
ólífuolía
salt, svartur pipar, sykur, basilika, oregano, paprikuduft, chilli, cayanne pipar.

Rauð sósa

Aðferð :

Laukurinn er skorinn smátt.
Gulræturnar rifnar
hvítlaukurinn rifinn eða pressaður.
Látið mýkjast á pönnu í ólífuolíu.
Linsunum bætt við ásamt vatni, grænmetistening og tómatgumsi.
Látið sjóða þar linsurnar eru tilbúnar (35-45 mín).
Kryddað (örlítill sykur dregur fram tómatbragðið).

Hvít sósa

Hráefni :

300-400 g kotasæla
3 dl rifinn ostur (hluti geymdur þar til síðast)
200 g frosið spínat
salt, hvítur pipar, múskat.

Hvít sósa

Aðferð :

Spínatið er látið þiðna og vatnið kreyst vel úr því.
Öllu blandað saman og kryddað.

Lasagne plötum er raðað á botnin í eldfast form.
Því næst er sett rauð sósa, plötur, hvít sósa og plötur.

Þetta er endurtekið þar til formið er fullt.

Endað er á plötum, ofan á þær er stráð rifnum osti og að lokum er 1 dl af mjólk hellt yfir allt saman.

(Hér má frysta aukaformið sem er búið til því að uppskriftin er aldrei gerð minni en tvöföld.)

Bakað í ofni í ca. 40 mínútur.

Gúrkustafir með Hoisinsósu

2007-08-08T15:16:00.000Z

Hráefni :

Gúrka

Hoisinsósa :

1/2 dl hoisin-mauk ( tilbúin kínversk kryddsósa )
1/4 dl sesaMolía
1/2 dl sykur
1/2 dl japönsk sojasósa
2 msk semsamfræ

Aðferð :

Gúrka er skorin í stafi

Sósa :

Blandið sósuna
Berið fram í skál með gúrkunni og gjarnan litlum ósætum pönnukökum eða góðu brauði

Bakaðir Sveppir

2007-08-08T15:15:00.000Z

Hráefni :
8 stórir sveppir ( eða fleiri litlir )
50g smjör
4 hvítlauksrif
2 tsk sítrónusafi
Steinselja
2 msk hakkaðar kryddjurtir

Aðferð :
Raðið sveppunum í eldfast mót, með fótunum upp.
Bræðið smjörið með hvítlauknum
Bætið steinselju út í
Hellið yfir sveppina
Bakið í hálftíma við 175°C
Berið fram heitt.

Kryddbrauð

2007-08-08T15:14:00.000Z

Hráefni :

3 bollar Haframjöl
3 bollar hveiti ( eða spelt )
2 bollar sykur ( eða hrásykur )
2 tsk lyftiduft ( eða vínsteinsduft )
1 tsk matarsódi
1 tsk kanill
1 tsk kakó
1 tsk negull
1 tsk engifer
3 bollar mjólk ( hægt að nota soyamjólk, hrísmjólk eða möndlumjólk )

Aðferð :

Allt sett í skál og blandað saman
Hitað í ofni á 200°C Í 1 klst.

Kjúklingasúpa

2007-08-08T15:13:00.000Z

Hráefni :

Laukur
Gulrætur
Sellerí eða purrulaukur
Sellerírót
Hvítlaukur
Kjúklingaleggir
Vatn
Pipar, chiliduft, kjúklingakraftur og Herbal salt.

Aðferð :

Skar 1 lauk í grófa bita (ca.8), setti í pott.
Bætti út í því sem var til í ísskápnum sem voru gulrætur (slatti), sellerí ( Púrrulaukur ), sellerírót, FULLT af hvítlauk (ein 7 eða 8 rif) og svo kjúklingaleggina.
Svo hellti ég 2 lítrum af vatni yfir.
Kryddaði með smá pipar, smá chilliduft, smá kjúklingakraft og herbal-salt.
Sjóða í klukkutíma

Grænmetissúpa

2007-08-08T15:12:00.000Z

Hráefni :

Það grænmeti sem til er í ísskápnum eða eftirfarandi :

Púrrulaukur
Kartöflur
Rófa
Sveppir
Gulrætur
Paprikka ( rauð eða græn)
Lauk ( ég nota laukduft )
Hvítlaukur ( eða hvítlauksduft, nóg af því )
Blómkál
Sætar kartöflur
Brokkolí

2-2,5 L af vatni

Grænmetiskraftur

Krydd :

Salt
Pipar
Chilipipar
Cayennepipar
Ítölsk kryddblanda

Aðferð :

Steikja púrrulaukinn, lauk og hvítlauk í smá olíu.
Léttsteikja það grænmeti sem á að nota
Bæta við vatninu og grænmetiskraftinum
Krydda að vild.
Láta sjóða í 30 - 60 mín.
Hægt að hafa kjúkling með , þá er hann skorinn í bita og soðinn með en þá er suðan að lámarki ( 40 ) mín.
Gott að hafa með þessu hrísgrjón eða pasta
Borið fram með góðu brauði
Doritosflögur settar úti í, ásamt sýrðum rjóma og salsa sósu.

Söndru döðlur

2007-08-08T15:08:00.000Z

Hráefni :

Döðlur
Marsipan
Núggat
Dökkur Ópal súkkulaðihjúpur

Aðferð :

Opnið döðlurnar
Takið steininn úr
Setjið marsipan og núggat inn í staðin.
Hjúpið með súkkulaði.

Sælkera konfektkúlur

2007-08-08T15:07:00.002Z

Hráefni:

200g Ren Ra marsipan
100g Anton Berg karmellumolar
Grand Marnier eftir smekk
Brætt ljóst súkkulaði

Aðferð :

Myljið karmellumolana niður í hrærivél og blandið þeim saman við marsipan og Grand Marnier.
Varast ber að hafa blönduna of blauta.
Kælið
Mótið kúlur
Húðið þær með ljósu súkklulaði og skreytið að vild.

Salthnetur í konfekt

2007-08-08T15:07:00.001Z

Hráefni :

200g Ren Ra marsipan
100g nougat
50g hakkaðar salthnetur
Brætt ljóst/dökkt súkkulaði

Aðferð :

Rúllið saman marsipan niður með kökukefli eftir smekk.
Gerið það sama við núgatið og hafið það í sömu stærð.
Leggið núggatið ofan á masipanið og sáldrið hökkuðum salthnetum á annan helmingin.
Þrýstið hnetutunum ofan í núggatið og brjótið svo hinn helminginn yfir.
Rúllið yfir með kökukefli í u.þ.b. 5-8 mm þykkt og skerið í ferninga.
Kælið molana, húðið með súkkulaði og skreytið að vild.

Regbogakúlur

2007-08-08T15:06:00.000Z

Hráefni :

Marsipan
Núggat
Dökkur Ópal súkkulaðihjúpur

Aðferð :

Skerið núggatið í litla teninga.
Fletjið út bita af marsipaninu milli fingranna,
vefjið utanum núggatið og mótið kúlu.
Hjúpið með súkkulaði.
Til skemmtunar fyrir börnin má nota marsipan í nokkrum litum.

Möndluskellur

2007-08-08T15:05:00.000Z

Hráefni :

Heilar möndlur
Dökkur Ópal súkkulaðihjúpur

Aðferð :

Skerið möndlurnar niður í nálar.
Blandið út í sem minnst magn af bræddu súkkulaði en nægilegt til að hylja möndlurnar.
Setjið skellur í konfektform með teskeið og látið storkna.

Kobbakúlur

2007-08-08T15:01:00.000Z

Hráefni :

100 gr núggat
35 gr valhnetur
100 gr konfektmarsipan
50 gr flórsykur
50 gr rúsínur
100 gr rjómasúkkulaði
Dökkur Ópal súkkulaðihjúpur

Aðferð :

Setjið allt nema hjúpinn í matvinnsluvél og hakkið mjög vel saman.
Mótið kúlur
Kælið í 10-15 mín.
Hjúpið og veltið upp úr valhnetumylsnu.

Kanil-kókoskúlur

2007-08-08T15:00:00.000Z

Hráefni :

200 g þurrkaðir papaya- og ananas bitar
1 dl kókosmjöl
6-8 Nóa kókosbitar
100 g Suðusúkkulaði, brytjað
100 g pekanhnetur
2-3 msk. mjúkt smjör
1/2-1 tsk. kanill
Dökkur ópal hjúpur

Aðferð :

Setjið allt í matvinnsluvél og hrærið þar til allt verður að þykkum massa.
Mótið kúlur úr massanum
Hjúpið þær með hjúpnum.
Stráið kókosmjöli yfir.
Geymið í lokuðu íláti.

Iðnaðarmannakonfekt

2007-08-08T14:59:00.000Z

Fylling :

axað Cote d'Or súkkulaði (56 %)
1/2 dl rjómi
1/2 dl koníak ( Hennessyl)
50g smjör
Odense súkkulaðidropar

Aðferð :

Bræðið saman 300g af súkkulaði yfir vatnsbaði.
Sjóðið rjómann og blandið honum saman við brædda súkkulaðið í smá skömmtum.
Blandið koníaki og smjöri saman við og hrærið þangað til allt er komið saman.
Hellið blöndunni í t.d. eldfast mót, setjið yfir hana elshúsfilmu og kælið yfir nótt
Fyllinguna má einnig móta í kúlur og húða með súkkulaði

Steyping í súkkulaðimót :

Súkkulaðið er brætt og steypt í form og berst er að nota Odense súkkulaðidropa.
Ef skreyta á molanna er einna best að bræða hvítt súkkulaði með og sprauta yfir formin fyrst með því.
Súkkulaðinu er svo hellt af formið sett inn í kæli og tekið út eftir 5-10 mín. eða eftir að súkkulaðið er harnað í forminu.
Því næst er koníaksfyllingin sett í.
Súkkulaðinu er hellt yfir og formið hrist vel til að losa um loftbólur sem leynist í forminu.
Þá er súkkulaðið skafið af
Formið sett aftur inn í kæli í 10-20 mín eða þar til súkkulaðið er orðið hart og molarnir losaðir úr forminu

Karrý-mangochutney-kjúklingur

2007-08-08T14:58:00.000Z

Hráefni :

5-6 kjúklingabringur eða 1 heill bitaður og beinlaus
4 rif hvítlaukur
1 peli rjómi (nota alltaf kaffirjóma)
1/2 krukka mangóchutney (ég nota sweet mangoc. frá Rajah)
1 msk karrý (ég nota oft meira)
Kóríanderlauf (má sleppa, ég hef aldrei notað það)

Aðferð :

Skerðu kjúklingabitana í litla bita, kryddaðu með salti og pipar og steiktu á pönnu í örlítilli olíu.
Þegar kjúklingurinn er næstum gegnsteikturbættu þá söxuðum hvítlauk, rjóma, mangóchutney og karrý út á pönnuna.
Blandaðu öllu vel saman.
Láttu malla í ca 15 mín.
Stráðu kóríanderlaufi yfir undir lokin.
Berðu fram með hrísgrjónum, salati og hvítlauksbrauði.

Vatnsdeigsbollur

2007-08-08T14:54:00.002Z

Hráefni :

80 g smjör
2 dl vatn
100 g hveiti
2 – 3 egg

Aðferð :

Stilla ofninn á 200°c.
Vatn og smjör sett í pott og soðið.
Hveiti sett úti og hrært með SLEIF.
Taka pottin af og hræra þangað til deigið sleppir sleifinni og pottinum.
Láta degið kólna dálítið.
1 egg sett í einu. Hrært vel á milli.
Skvettur af deginu sett á plötu með ágætu bili.
Platan sett í miðju ofnsins.
Hitað í 20 – 30 mín.
ATH. Má alls ekki opna fyrstu 15 mín. því þá vilja þær falla saman.
Klippa í bollurnar þegar þær eru teknar út.

Hveitikökur Kristrúnar

2007-08-08T14:52:00.000Z

Hráefni :

5 bollar hveiti eða 4 bollar hveiti og einn af rúgmjöli
( 2,5 dl spelt og 2,5 dl rúgmjöl)
3 tsk lyftiduft
½ tsk salt
2 msk sykur
1 msk smjör
3 dl köld mjólk
1-2 egg

Aðferð :

Hnoðið fljótt saman.
Flatt út í mátulega stórar kökur (12-18 stk).
Bakað á þurri pönnu, ekki á hæsta hita (4-5 af 6).
Látið í stafla á meðan bakað er (þá haldast þær mjúkar) og svo í plastpoka.
Best er að frysta kökurnar ef það á að geyma þær lengur en 1 dag.

Pizzudeig

2007-08-08T14:51:00.000Z

Hráefni :

15g pressuger
1 1/4 dl volgt vatn
3 1/2 dl hveiti
1/2 tsk salt
1/2 tsk sykur
1 1/2 msk matarolía

Aðferð :

Hellið öllu í eina skál
Látið hefast í 30 mín
Hitið við 180°C í 15-20 mín

Töffari

2007-08-04T18:02:00.000Z

Þessi mynd var tekin 13. september 2006. Víkingur næstum 3ja vikna gamall.
Hann er í fystu sokkunum sem hann fékk í sængurgjöf, fótboltasokkar sem hann fékk frá Hildi og Axel. Buxurnar fékk hann í sængurgjöf frá Önnu Maríu og samfellan fékk hann í sængurgjöf frá Halla og Sigrúnu.

Blómin eru frá prima ( minnir mig ).
Tölurnar eru splitti sem ég fékk í RAK eitt sinn.
Borðann keypti ég í saumnálinni.
Litlu hvítu blómin keypti ég af Huldu P eitt sinn.
Grunnpp er hvítur frá Canson
Hringpp er frá american Crafts, man ekki hvað hann heitir.
Ljós blár og dökk brúnn bazzil pp.
Titillinn er gerður úr Sizzix stöfum, graffiti.

Þessi síða tekur þátt í helgaráskorun hjá henni Huldu P. Lo er frá Becky

Moster

2007-08-04T17:58:00.000Z

Ömmusystir mín er á landinu. Ég var svo mikið hjá henni á sumrin þegar ég var unglingur. Nú er hún hér að heimsækja ömmu og afa og auðvitað okkur hin líka.

Gerði því eina síðu henni til heiðurs :)

Þetta er bazill pp og pp frá rob and bob.
Rikrak borðinn er úr saumnálinni.
Stimplarnir ( dútlið ) eru fancy pants stimplar 12x12.
Cb er frá bazzil.

Þessi mynd er tekin 3. ágúst ( fyrir ári síðan ). Moster kom þá hingað til landsins til að sjá gullmolann minn.

Kominn á skrið

2007-07-28T11:48:00.000Z

Langt síðan ég hef sett eitthvað hingað inn. Hef ekki verið að gera neitt og allt hefur verið við það sama hjá okkur fjölskyldunni.

Mér tókst að gera eina síðu um daginn, á eftir að leggja lokahönd á hana og þá munuð þið geta séð hana hér inni.

Víkingur Atli er loksins farinn að skríða, byrjaði á því í gær og er núna að æfa sig. Hann þýtur um allt í göngugrindinni þannig að það er ágætt að hann læri líka að koma sér á milli staða án hennar.
Hann er farinn að þyngjast aftur. Hann var vigtaður seinasta miðvikudag, þá var hann orðinn 8280g og 70 cm.

Hann varð 11 mánuða seinasta þriðjudag. Nóttina áður flutti hann yfir í sitt eigið herbergi og líkar það mjög vel. Steinsefur alla nóttina. Til að byrja með hafði ég barnapíutæki þannig að ég heyrði í honum. Það var samt stór galli á tækinu. Það nam bara hljóð en ekki andardrátt. Víkingur Atli getur ekki sofið kyrr og er því á fleygiferð um rúmið sitt alla nóttina ( kannski eins og mamma sín haha sem snýr sér ótalsinnum yfir nóttina, hún er þó hætt að snúa sé þannig að hún liggi með höfuðið þar sem fæturnir eiga ða liggja haha ). Ég heyrði því skruðnina hálfa nóttina. Í gær ákvað ég að hafa bara angelcarið í gangi ( nemur hreyfingar og lætur vita ef engin hreyfing ( nemur andardrátt ) kemur í 20 sek. ) og það dugði. Ég svaf og allir ánægðir hehe.

Kiddi er núna að hjóla strandlengjuna í kringum Rvk og ætlar að enda heima hjá foreldrum sínum, þetta eru rúmir 40 km. Smá æfing fyrir hálfmaraþon sem hann ætlar að hlaupa í Reykjavíkurmaraþoninu.

Afmælishjarta

2007-07-15T12:09:00.000Z

Bjó til afmæliskort handa mömmu minni sem á afmæli í dag.

Það er notaður rauður pp, bjó til 3 eintök af hjarta. Saumaði á eitt eintakið, límdi annað við og saumaði saman kantana.

Festi 3ja hjartað við með splitti. Skrifað er á 3ja eintakið.

Ást

2007-07-13T21:40:00.000Z

Gerði loks eitt kort, kortagerðin hefur lengi legið á hakanum hjá mér. Úff ég skulda sko kort í kortaklúbbnum mínum og finnst það agalegt. Nú fer vonandi að koma kraftur í kortagerðina hjá mér og ég bý til skemmtileg kort handa stelpunum.

Bjó sem sagt til þetta kort fyrir mömmu og saumaklúbbinn hennar. Þær eru að fara í brúðkaup á morgun, verið að gift son einnar saumaklúbbnum. Vonandi eiga þau góðan dag.

Pavlova með súkkulaðifrauð

2007-07-02T16:18:00.000Z

Er með þessa köku í kvöld.

Pavlova með súkkulaðifrauði

Undibúningstími : 50 mín
Eldunartími : 45 mín
Fyrir 10-12

Botnar :

6 eggjahvítur
335g sykur
2 1/2 msk kakó

Fylling
200g dökkt suðusúkkulaði, brætt
6 eggjarauður
1 msk skyndikaffi
1 msk vatn
625 ml rjómi, þeyttur

1. Hitið ofninn í 150 °C. Setjið bökunarpappír á 4 bökunarplötur og gerið hringi með 22 cm þvermáli á 3 þeirra en dragið beinar línur með 3 cm millibili á fjórðu.
Stífþeytið eggjahvíturnar í þurri skál og bætið síðan sykrinum í smám saman og þeytið á fullum krafti á meðan.. Þeytið í 5-10 mín eða þangað til sykurinn er uppleystur og marengsinn þykkur og gljáandi. Blandið syktuðu kakóinu varlega í.

2. Skiptið marengsinum í 4 hluta. Breiðið 3 þeirra innan hringjanna á plötunum 3. Setjið fjórða hlutann í rjómasprautu með sléttri túðu og sprautið eftir línunum á fjórðu plötunni. Bakið í 45 mín eða þangað til marengsinn er ljósgullinn og stökkur að utan.
Gætið þess að lengjurnar verði ekki ofbakaðar.
Slökkvið á ofninum og látið marengsinn kólna í honum með opna hurðina.

3. setjið brætt súkkulaðið í skál og og þeytið eggjarauður og kaffiduft, uppleyst í vatninu saman við. Þeytið þar til mjúkt. Blandið þeytta rjómanum varlega saman við og hrærið þar til allt hefur samlagast vel.
Kælið frauðið í ísskáp þar til það er kalt og þykkt.

4. Setjið einn af marengsbotninum á kökufat og breiðið 1/3 af frauðinu yfir. Setjið annan botninn ofan á og helminginn frauðsins ofan á hann.
Setjið þriðja botninn þar ofan á og það sem eftir er af frauðinu ofan á og með hliðunum. Rennið hnífi eftir kökuröndinni til að jafna frauðið.
Brjótið eða skerið marengslengjurnar í 5 cm búta og raðið bitunum allan hringinn eftir kökuhliðinni og látið þá festast í frauðinu.
Staflið afganginum ofan á.

Stráið kakói yfir og kælið í ísskáp þar til kakan hefur stífnað.

Alexandra Rós og Sigurrós Elísa

2007-07-02T11:43:00.000Z

Dagurinn í dag er tileinkaður þeim. Fyrir 2 árum þá fæddust þessi 2 ljós sem slokknuðu svo skyndilega en lifa þó enn í hjörtum okkar sem minnast þeirra.

Þær fengu nöfnin Alexandra Rós ( fæddist á undan ) og Sigurrós Elísa ( fæddist klst seinna en systir hennar ). Alexandra Rós var eins og ég ( auðvitað haha ) og Víkingur Atli bróðir hennar er eins og hún. Hún var fyrst og fékk því Alexöndru nafnið því það byrjar á A. Lengi var haldið í vonina að Sigurrós myndi ekki koma því þær voru ekki með sömu legkökuna en klst. seinna eftir fæðingu Alexöndru þá brást sú litla von þegar eftirmynd pabba síns kom í heiminn. Mikið voru þær ólíkar þessar tvíburasystur, svart og hvítt. Þær voru nokkuð stórar, Alexandra var 28 cm og 425 g ( stendur 25 cm á spjaldinu sem við fengum við fæðinguna en við nánari rannsókn var hún mæld 28 cm ). Sigurrós var stærri og þyngri, hún var 30 cm ( 28 við fæðingu ) og 475 g. Þær fæddust kl .8:25 og 9:15 á laugardagsmorgni í herbergi 1 á meðgöngudeildinni eftir 40 tíma hríðar. Sú sem tók á móti henni heitir Sigga og er yndisleg ljósmóðir á meðgöngudeildinni.

Í kvöld er svo kaffiboð fyrir ömmur, afa, systkini okkar og langömmur og langafa.

Sæta mús

2007-07-01T18:27:00.000Z

Sæta mús.

10 atriði um sætu músina mína. Hann er sterkur, ákveðinn, skemmtilegur, matargat, hetja, prakkari, yndislegur, alltaf brosandi, dundari og að lokum baráttuglaður.

Ég notaði pp frá K & Company, græni pp og röndótti er úr Girl Scouts línunni og blómstraði úr Amy Butler línunni. Svo er brúnn bazzil undir atriðunum.
Borðann fékk ég í saumnálinni.
Splittin eru frá making memories
Blómin eru úr europris
Titillinn er rubon frá Heidi -making memories
Blingið í blóminu fékk ég í rak-i
Myndin af Víkingi Atla var tekinn daginn sem hann varð 2ja mánaða ( þá var hann 52 cm og 3,8 kg ).

Ein heima

2007-06-30T14:21:00.000Z

Í fyrsta sinn í marga mánuði þá er ég ein heima. Kiddi og Víkingur Atli fóru til tengdaforeldra minna í morgun og ég er heima að hvíla mig. Ég var svo svakalega þreytt, sofnaði kl. 22-23 í gær, sofnaði út frá myndinni sem ég var að horfa á og vaknaði kl. 14 í dag. Reyndar vaknaði ég við Víking Atla í morgun og fékk mér morgunmat en ég steinsofnaði um leið og lokaði augunum.
Ég fæ að vera ein heima í allan dag, þvílíkur lúxus !!

Áskorun

2007-06-26T14:21:00.001Z

Tek hér þátt í áskorun sem er í gangi á spjallsvæði scrap.is.

1. Um hvað var síðasta síðan sem þú gerðir?
Son minn Víking Atla. Notaði myndir sem voru teknar af honum 9. sept. þá um 2ja vikna gamall. Myndirnar voru meðal þeirra fyrstu sem við náðum af honum þar sem hann var með augun opin.
2. Hvaða skrappara lítur þú upp til og af hverju?
Margra, þeirra sem koma með fallegar og flottar skissur, mikið hugmyndaflug og fallegt hráefni til að vinna úr. T.d. Begga, Hannkj, Barbara, Magga, Erla Rún og fleiri
3. Hvað hefur þú ekki gert á skrapp síðu en langar að prufa?
Hef ekki prufað að hefta , né notað límstafi ( glimmer sett á þá , voða flott ).
4. Hvaða tími dagsins hentar þér best til að skrappa?
Dagurinn er bestur, þegar Víkingur Atli sefur lúrana sína
5. Settu link inn á 2 blogg sem þú heimsækir reglulega.
http://gettinsketchy.blogspot.com og svo Beggu skissur , er ekki með linkinn á síðuna þar sem hún er lokuð í augnablikinu

Mömmustrákur

2007-06-26T13:49:00.001Z

Víkingur Atli er aftur orðinn veikur. Núna er hann með ljótan hósta og smá nefrennsli. Ofan í þetta eins og vanalega þegar hann fær hósta þá fékk hann astma með.
Nóttin í nótt var þolanleg en nóttin þar áður var ekkert sofið nema svona rétt til málamynda. Hann svaf í kannski hálftíma - klst milli 3-4 eftir að við gáfum honum ventolinið. Fengum bara að vita að hann mætti fá það 4 sinnum á dag þannig að við þorðum ekki að gefa honum það um nóttina , gafst svo upp og hringdi niður á bráðamóttöku barna til að forvitnast hvort við mættum ekki gefa honum það oftar. Júbb, á 4ja tíma fresti. Jiiiiii hvað ég varð ánægð því þetta var það eina sem róaði hann niður og hann sofnaði !!! Smá orkusöfnun fyrir næsta kast því það virkaði ekki lengi en við fengum smá svefn.
Fórum svo aftur með hann niðureftir í gærdag. Vorum svo heppin að hitta á Björn Árdal ofnæmislækni. Hann setti hann á steratöflur. Þær fara nú ekkert voðalega vel í hann en hann er á batavegi heyri ég. Hóstar ekki nærri því jafn mikið en er samt með astmaandardráttinn. Vonandi nær hann að hrista þetta af sér í eittskipti fyrir öll og verður frískur á ný.

Augun mín

2007-06-25T16:06:00.001Z

Víkingur Atli er hér 2javikna og eru þetta með fyrstu myndunum sem nást af honum með opin augun. Hann liggur voðalega rólegur á maganum á hnjánum hjá mér eða pabba sínum.

Augun hans voru risastór og falleg, blá með hvítum hring í kringum augasteininn.

Pp er brúnn bazzill og græni pp er frá american crafts. Úr línunni a la carte florentine. Keypt í Fjaðrarkaup

Borðinn er keyptur í búðinni saumsporið í kópavogi.

Blingið er frá Prima ( pantað að utan í gegnum hana Gógó ).

Blómin er ég ekki alveg viss hvaðan þau eru en ég keypti þau af henni Gógó.

Stafirnir eru frá making memories, be inspired. Heita chekky shimmer stickers. Keypti þessa í target í Boston en ég sá svipaða í Fjarðarskrappi.

Stóra blómið er frá europris og splittið í miðjuni er frá prima, heitir Brad Bitt og er hluti af glaðningi sem ég fékk frá Fjarðarskrappi fyrir að hafa verið dregin úr potti í opnunarhátíð spjallsins þeirra.

Pabbaknús

2007-06-24T20:37:00.001Z

Hér er mynd af strákunum minum. Minnir að Víkingur Atli hafi verið um mánaðar gamall á þessari mynd ( jiii 9 mánuðir síðan ). Hann var nýbúinn í baði, sem honum þótti algjört æði, og var hér innvafinn í taubleyju í fanginu hjá pabba sínum.

Pp er frá provocraft, rob and bob studio.
Brúni pp er frá bazzil ( keypti í fjarðarskrappi )
Stafirnir eru gerðir eftir fancy pants cb. ( fékk cb í jólagjöf frá leynivini )
Hringurinn er inkaður með bazzink, liturinn er admiral ( keypti í fjarðaskrappi )
Stafirnir eru málaðir með mm málningu ( keypt í fjarðarskrappi )
Rubon , hvítt, frá american craft, minimarks, accents book three.

10 mánaða í dag

2007-06-24T11:24:00.000Z

Litli Víkingurinn minn er orðinn 10 mánaða. ótrúlegt. Hann er svo mikil dúlla. Hann er þvílíkt sprækur fyrir utan veikindi. Hann er síbrosandi og "talar" á fullu, hefur frá mörgu að segja. Því miður þá skil ég bara eiginlega ekkert af því sem hann segir nema þegar hann segir mamamamamamama og ef hann er reiður þá kemur MAMMA !!! Hann segir líka amma og ava og ohhh hehe.
Hann er farinn að klappa saman lófunum og líka iljunum, vinka ( samt ekki alltaf, oft þegar viðkomandi sem er að fara er farinn hehe ).
Það nýjasta er að brosa rosalega mikið svo það sjáist í tönnslurnar sem eru komnar og kreista aftur augun og krumpa saman nefið eins og sést á myndinni hérna.
Við höfum því ákveðið að baka pönnukökur eða vöfflur í tilefni dagsins og laga til hér heima, hmmm spennandi það síðarnefnda.

Magnochutney-gullostur

2007-06-18T14:51:00.000Z

Geggjað gott

1 stykki gullostur
Mangochutney sett út á og yfir og furuhnetur eða aðrar hnetur yfir.
Inn í ofn í smá tíma.
Sett á kex eða bara beint upp í munn.

Mangolax

2007-06-18T14:47:00.000Z

Lax
Mangochutney smurt yfir hann og rjóma ( með mangochutney blandað við ) sett í botninn.
Sett inn í ofn og látið bakast þar til það er tilbúið.

Ótrúlega gott, bara æði.

Gott með nýjum kartöflum, salati eða hrísgrjónum og salati.

Helgin

2007-06-18T09:37:00.000Z

Við vorum á fullu alla helgina.

Á föstudaginn áttum við brúðkaupsafmæli og Kiddi bauð mér út að borða en Víkingur Atli fór í dekur til móðursystur minnar.

Við náðum svo í Víking á laugardagsmorgninum og fórum í kvennahlaupið ásamt mömmu, Hildi og Dagnýju. Víkingur Atli og Dagný Björt sváfu nú kvennahlaupið af sér en við þrjár sem vorum fótgangandi gengum 5 km, nokkuð ánægð með mig að geta það. Fórum svo í kaffi til Ebbu á eftir en þar voru þau Kiddi og Hósý tengdamamma að horfa á kvennalandsleikinn í fótbolta. Pínu hallærislegt að hafa kvennahlaupið og kvennalandsleik í fótbolta á sama tíma, en það var ekkert við því að gera ( ég hefði ekki mætt á leikinn en ábyggilega einhverjar sem þurftu að velja).

Í gær var svo 17. júní og þá var skundað í bæinn. Snúðurinn okkar fékk bangsimonblöðru og við áttum íslenskan fána sem hann var með og veifaði ótt og títt. Hann skemmti sér konunglega og við líka. Ótrúlega gaman að fara loksins í bæinn með sitt barn í stað þess að vera barnlaus. Draumurinn orðinn að veruleika. Loksins getum við hætt að hugsa " svona ættum við að vera " þegar maður horfir á par með barn eða börn.
Fórum svo í skírnarveislu seinni part 17. júní til Huldu Hrannar og Hafsteins. Kristjana Rögn var skírð og var hún nokkuð ánægð með það. Nafnið fékk hún stuttu eftir fæðinguna þannig að það er komin reynsla á nafnið, hæfir þessari prinsessu nokkuð vel.
Set inn myndir seinna í dag.

5 ÁR í dag...

2007-06-15T11:00:00.000Z

... síðan við Kiddi gengum í heilagt hjónaband :) Fyrir 5 árum síðan var ég í hárgreiðslu á þessum tíma, síðan kom vinkona mín heim til að farða mig og önnur vinkona mína var með mér allan tíman til að taka myndir og svoleiðis :) Þetta var yndislegur dagur. Tíminn leið ekkert smá hratt og ég gleymdi eiginlega alveg að borða, hafði eiginlega enga lyst ( ætli spenningurinn hafi ekki verið það mikill ). Athöfnin byrjaði kl. fimm í Garðakirkju. Afi minn var svaramaður minn og við vorum keyrð heiman frá mömmu í Bleikum Cadilac, bílstjórinn var hún Soffía, mamma vinkonu hans Kidda. Soffía átti þennan flotta bíl.
Veislan var svo haldin í sal Fjölbrautaskólans í Garðabæ. Æðislegur salur. Það var dekkað á borð fyrir 130 manns, 120 manns mættu svo í veisluna ( sumir höfðu ekki fyrir því að láta vita fyrirfram að þeir kæmu ekki ). Við vorum með 3 rétta hlaðborð. Mamma, amma mín og nokkrar frænkur mínar bjuggu til matinn. Tengdaforeldrar mínir, móðurafi og amma hans Kidda og móðurbróðir hans skáru niður kjötið sem var á hlaðborðinu. Vinkona mömmu og systir hennar bjuggu til brúðkaupskökuna, ótrúlega góða pavlovu ( sem er kakan mín , alltaf gerð í afmælum og öðrum veislun hjá okkur ). Vorum með borðvín , gos og vatn með matnum. Koníak með kaffinu og kökuni og þegar líða tók á kvöldið og fólk byrjaði að dansa þá var komið með bjór.
Vinkonur mínar sem voru í hljómsveit sem spilaði írsk lög spilaði fyrir dansi en afi hans Kidda spilaði á harmóniku á undan, þar á með spilaði hann brúðarvalsinn :)
Við gætum ekki verið ánægðari með veisluna. Nú eru fimm ár liðin, mikið búið að ganga á. Sem betur fer hefur það styrkt hjónaband okkar enn frekar í stað þess að það hafi flosnað upp.
Víkingur Atli ætlar að fara í næturgistingu til móðursystur minnar svo við Kiddi getum haft það kósý í kvöld.

Amma og afi

2007-06-14T17:02:00.001Z

Hér eru foreldrar mínir í heimsókn. Mamma að vísu ekki í sinni fyrstu heimsókn, en þetta er fyrsta myndin af okkur 3 ur saman og pabbi er í fyrstu heimsókninni.

Pp er fancy pants Exquisite item #857
Dútlið er frá american crafts, accents book one
Blómið ofan á m-inu fékk ég frá Huldu P og talan í blóminu er frá mm.
Blingsteinarnir í a-unum er úr litir og föndur.
Ég inkaði stafina með inki frá All night media- pigment ink- litur er dark sage og & er inkaði með pigment stamp pad frá Color Box - liturinn er cranberry.

Myndirnar eru teknar í september 06

Verslunarleiðangur

2007-06-13T22:03:00.000Z

Fór í smá verslunarleiðangur í dag. Keypti eftirfarandi :

Glær geisladiskahulstur í Rekstarvörum til að geyma blómin í.
Kertakransar í Europris. Tek blómin af krönsunum í sundur, 9 blóm fyrir 99 kr.
Gerviblóm í Europris, stór blóm á góðu verði.
Box til að sortera vel borðana mína í nálinni á laugarveginum.

Það er hægt að versla fyrir skrappið á öðrum stöðum en bara í föndurbúðum og ef maður hugsar nógu mikið og aflar sér upplýsinga þá er margt hægt að nota til að nota í skrappið.

Prins

2007-06-11T22:27:00.000Z

Víkingur er hér vikugamall. Svaf með hendina fyrir ofan höfuðið. Með sondu í nebbanum og svo lítill. Myndin var tekin á vökudeildinni, nánar tiltekið á vaxtarræktinni, miðjuherbergi þann 31. ágúst 06.
Pp er frá provocraft, Rob and bob studio. Pappír sem ég keypti í Boston.
Stimplarnir eru frá autumn leaves Flourishes v.2
Setti blingsteina á dútlið.
Hvítu blómin eru frá bazzil. Bláu blómin keypti ég af Huldu P.
Hvítu tölurnar í blómunum eru frá Making Memories og eru splitti.

Stúlkurnar mínar

2007-06-10T20:04:00.000Z

Úff það fer að styttast ísskyggilega í 2ja ára "afmælið" þeirra Alexöndru Rósar og Sigurrósar Elísu. 2 ár síðan þær komu í heiminn og yfirgáfu þennan heim. Á þessum tíma fyrir 2 árum voru þær sprelllifandi og spörkuðu í mig af krafti en það átti eftir að breytast hratt innan mánaðar. Þær voru sterkar, spörkuðu í mig fram á seinustu stundu eða þangað til ég hætti að muna í fæðingunni. Ég sakna þeirra á hverjum degi en ég veit líka af þeim þar sem þær passa upp á litla bróður sinn, vaka yfir honum og láta okkur Kidda , mömmu sína og pabba , vita þegar eitthvað bátar á hjá honum. Það hafa svo margar tilviljanir komið upp sem hafa leitt til þess að alvarlegir sjúkdómar hafa komið í ljós hjá honum Víkingi okkar. ótrúlegt alveg hreint. Ég er því fullviss um það að stúlkurnar okkar passa litla bróður sinn vel og eru okkur innan handar með umönnun hans.

Við Kiddi fórum út í kirkjugarð í dag og gerðum leiðið þeirra voðalega fínt og stelpulegt. Krossinn þeirra er reyndar orðinn frekar slitin en vonandi getum við sett hjá þeim fínan og stelpulegan stein. Settum einnig blóm hjá litlum dreng sem liggur nærri þeim og ég þekki mömmu hans , góð kona með ljúfa sál :)

Allt of mikið af ungabörnum sem liggja í kirkjugarðinum þeirra Alexöndru Rósar og Sigurrósar Elísu. Mörg sem liggja hjá ættingjum sínum en önnur sem liggja ein og sér og bíða ástvina sinna. Stúlkurnar okkar liggja saman, man eftir þeim, haldandi utan um hvor aðra eins og systrum sæmir. Ofursætar og fallegar stelpur sem voru teknar of snemma frá okkur. Sigurrós eftirmynd pabba síns og Alexandra svipuð mér. Víkingur Atli er keimlíkur systur sinni Alexöndru, við Kiddi sáum það strax í sónar. Sami munnsvipurinn :) Öll yndsleg börn, börn sem við höfum barist fyrir þótt baráttan hefur átt mismunandi endi og þau eru ekki öll hjá okkur þá eru þau hjá okkur í anda.

Eins mánaða opna

2007-06-09T20:12:00.001Z

Jæja þá er komin síðan á móti þeirri sem ég gerði um Víking Atla 1. mánaða.

Sami pp og áður. Dökkblái og ljósblái er frá ProvoCraft, Rob & bob studio og blómstraði er frá Fancy pants. Blingdútlið er frá Prima.
Hvítu blómin fékk í annaðhvort Rak eða afmæliskorti er frá Heidi ( held ég ).
Bláu blómin eru frá Bazzil og tölurnar fékk ég frá Hönnu KJ.

Tekstinn er á þessa leið.

Þú hefur :

Stækkað um 4 cm
Þyngst um 408 g ef frá fæðingarþyngd er talið
Höfuðummálið hefur stækkað um 2 cm
Þú ert kominn í fatastærð 50.
Athugull, sterkur, ákveðinn.
HETJA !!

Kúkur í koppinum og næturgisting

2007-06-09T19:43:00.000Z

Víkingur Atli prófaði koppinn í dag og kúkaði og pissaði í hann 2x. Hihi hann var ekkert smá stoltur af sér ;)
Hann verður í heimsókn hjá ömmu sinni í nótt þannig að við foreldrarnir munum eiga kósý kvöld saman.

Litla barn

2007-06-08T13:20:00.001Z

Texti :

Þú varst langþráður draumur sem varst orðinn að veruleika. Lást í fanginu mínu svo ljúfur, vær og góður. Yndislegur ilmur af þér og gott að halda í fingur þína. Þú vars með svo sterkt grip strax frá fyrsta degi. Inger langamma þín heldur hér í þig meðan þú sefur. Vökudeild 1. sept. 06

Bling frá prima
Blóm úr afmæliskorti
Brúnn bazzil pp
Three bugs in a rug - Spicy- stripes
Chatterbox- great room- scarlett bloom
Classig K&Company die cut alphabet green stickers
Bling frá prima
og borði frá HönnuKJ

Loksins

2007-06-08T13:18:00.000Z

Þá erum við að koma til. Ég er öll að skána af kvefinu mínu og Víkingur litli Atli hóstar ekki jafn mikið og hann gerði.
Vonandi er þetta að verða gott svo við getum notið góða veðursins.

Endalaus veikindi

2007-06-07T10:34:00.000Z

Þá er ég sjálf orðin veik. Víkingur er enn veikur, Kiddi var veikur ( er það samt eiginlega enn en fór samt í vinnunna ) og nú er ég orðin veik. Seinustu skipti þegar fjölskyldan ( svo gaman að geta talað um fjölskylduna : ) ) hefur öll lagst í einhverja pest þá höfum við Kiddi skipst á að vera veik, fyrst hann svo ég. Ágætt að við séum það ekki samtímis því þá getur sá sem frískur séð um drenginn á meðan, nema hvað ég þarf auðvitað að sjá um hann á daginn þegar ég er veik. Ekki mikið um barnapössun þegar fjölskyldan býr svona "langt" í burtu og allt fullorðna fólkið í vinnu á daginn.

Afi 50 ára

2007-06-06T14:51:00.000Z

Þessi síða er gerð úr Basic Grey pp, úr Scarlet's Letter línunni. Hreinlega dýrka þá línu. Myndin er tekin þegar afi minn varð 50 ára ( hann 83 eða 84 í dag ).
Rauði borðinn er utan af jólapakka frá því jólunum í fyrra og blómin eru úr einhverju afmæliskortinu sem ég fékk í fyrra. Svarti borðinn fékk ég í opna Rakinu.
Vann eftir skissu sem hún Hanna Kristín gerði.
Járnskrautið fékk ég í föndurhorninu og ég setti glimmersteina á það til að fela götin sem eru á þeim.

Mislingabróðir og barkabólga

2007-06-05T16:40:00.001Z

Þá er komin niðurstaða yfir dularfullu veikindunum hans Víkings Atla í seinustu viku. Hann var með mislingabróður. Ágætt að vita það svona eftir á ;)

Fór með hann í blóðprufu í morgun og lét hlusta hann í leiðinni, því hann hefur verið að hósta ljótum hósta undanfarinn sólarhring. Þá er hann kominn með barkabólgu !!!!! Elsku litli karlinn minn. Nú er hann kominn á stera í 3 daga og vonandi flýtir það fyrir batanum. Það er eins gott að ég var ekki búin að boða mömmuhitting hér heima því í seinustu 3 skiptin sem ég hef ætlað að bjóða mömmuhópnum þá hefur hann veikst.

Fór í dag í litir og föndur til að kaupa blingsteina til að klára síðu sem ég er með á borðinu. Kassarnir með öllum steinunum voru búnir, nema 2 með pínulitlum hjörtum í mörgum litum. Þannig að ég keypti nokkra poka með steinum í mismunandi litum og stærðum. Nú ætti ég að geta klárað þessa síðu :)

Helgin

2007-06-04T10:58:00.000Z

Helgin okkar var fín, svona í heildina. Auðvitað fer ekki allt eins og maður hefði viljað að það færi en það er ekkert við því að segja , allavegana ekki svona eftir á :)
Lagaði aðeins til í skrappinu mínu. Sé að ég þarf að koma á betra skipulagi á blómin mín og borðana. Blómin taka allt of mikið pláss eins og þau eru í dag og ég sé ekki alveg nógu vel hvernig blóm ég á , sömu söguna er að segja um borðana. Allt of mikið drasl í þessari skúffu. Þarf að koma þessu betur fyrir einhvernveginn.

Er að komast í gegnum fyrsta mánuðinn í lífi Víkings Atla. Þarf að prófa að prenta út myndirnar sem eru bara til á barnalandi. Það töpuðust nokkrir af fyrstu dögunum hans Víkings Atla, frekar sárt. Þar eru meðal annars myndir af því þegar ég klæddi hann í fyrstu fötin ( eftir að hann var búinn að vera í hitakassa í nokkra daga ) og svo fyrsta baðið hans ( sem er frekar sárt að missa ).

Amma er að koma!!!

2007-06-01T17:45:00.000Z

Víkingur Atli opnaði ekki augun fyrr en nokkrum dögum eftir fæðingu. Ömmur hans voru alltaf að reyna að hitta á hann þegar hann var með opin augu en ótrúlegt en satt þá lokaði hann alltaf augunum og sofnaði rétt áður en þær komu. Við pabbi hans vorum farin að hlæja að þessu og gantast með það að við mættum ekki segja honum að þær væru á leiðinni.

Leiddu mína litlu hendi

2007-06-01T14:26:00.001Z

Þessi mynd var tekin þegar Víkingur Atli var vikugamall Þá var hann 45 cm og tæplega 4,6 kg. Langafi hans hélt hér í hendina á honum og Víkingur Atli hélt fast á móti.

Græni og tígullagaði pp er Chatterbox, scrapbook walls. Úr línunni Loft og heitir Small Spruce Argyle.
Blómið fékk ég í Fjarðarkaupi ( keypti gerviblóm og týndi í sundur ) og litla græna blómið held ég að hafa fengið í RAK einhvern tímann. Laufborðann keypti ég í Föndru fyrir löngu síðan og græni borðinn fékk ég með afmæliskorti.

Myndin var tekin 1. sept. 06

Kominn heim í bólið sitt

2007-05-31T14:10:00.000Z

Víkingur Atli er búinn að vera á spítala síðan á þriðjudaginn. Ástæðan er óskýr en hann er búinn að vera með háan hita frá því á mánudaginn og engin skýring fyrir hitanum. Vegna hans sjúkrasögu þorðu læknarnir ekki annað en halda honum inni í eftirliti meðan ástandið á honum var svona. Líkalega var þetta einhver veira en einu einkennin var hiti . Í gæreftirmiðdag eftir stærðarinnar sprengju frá neðri hlutanum varð hann hitalaus og varð aftur litli grallarspóinn og glaðværi víkingurinn.

Við fengum svo að fá gullið okkar heim í dag. Seinustu daga hefur hann ekki sofið nema í 30-60 mín í einu 2x á dag ( hann sem er vanur að sofa í 2 tíma 2x á dag ). Hann sofnaði í bílnum á leiðinni heim eða um hálf eitt og er enn sofandi, nú í rúminu sínu. Greinilega gott að vera kominn heim. Vonandi borðar hann vel í kvöld en hann hefur verið ansi lystarlaus seinustu daga, eiginlega bara neitað að borða nema ávexti.

Starfsfólkið á lyfjadeildinni er alltaf jafn ljúft og gull af manni, gerir allt fyrir mann og meira til. Svo gott að hafa barnið sitt þarna inn þegar maður á annað borð er með veikt barn. Eina sem má bæta er matarmál aðstandenda en ég hef nú heyrt að það sé í góðum farvegi. Nú fá foreldrar barna sem liggja inni í 2 vikur eða lengur kort til að framvísa og fá þá matarmiða á ódýrara verði en áður, líka fá foreldrar barna sem leggjast oft eða reglulega inn á spítalann samskonar kort. Enn þó er ekki búið að koma með lausn fyrir helgar og kvöldunum. Foreldrar þurfa greinilega ekki að borða þá LOL.

Næring foreldra og annarra aðstandenda

2007-05-30T19:42:00.000Z

Hvernig stendur á því að foreldrar barna á barnaspítala hringsins á Hringbraut geti ekki komist í almennilegan mat eftir kl. 14 á daginn nema þurfa að ganga langa leið til að komast í matsalinn. Kaffistofan niðri á 1. hæð lokar kl. 14 á daginn og er lokuð um helgar !! Þar er hægt að kaupa ýmisslegt, rándýra salatdiska og samlokur allskonar og súpu, gos og djús. Það vantar stað þar sem hægt er að komast í almennilegan mat til að næra sig og safna orku til að geta setið hjá veiku barni, oft á sama staðnum lengi lengi. Foreldrar barna sem eru með börn sem liggja inn lengi eða koma hingað oft ættu að geta keypt matarmiða á sama verði og starfsmenn til að geta keypt matinn niðri í kaffistofu á sómasamlegu verði. Salatdiskurinn kostar 850, að vísu vel út látinn en það er dýrt þegar maður þarf að kaupa nokkra svoleiðis í marga daga í röð.

Það komast heldur ekki allir foreldrar oft frá veiku barni til að kaupa eitthvað í stórmarkaði til að hafa í ísskápnum inni á hvíldarherbergi foreldra. Þar er örbylgjuofn og samlokugrill en vantar hellu svo það sé hægt að elda sér almennilegan mat. Maður lifir ekki endalaust á pizzu, skyndimat eða samlokum !!

Kvart kvart.

Vikingur Atli 1 mánaða

2007-05-28T17:02:00.000Z

Mér tókst það. Kláraði eina síðu sem ég er búin að vera með lengi lengi á borðinu mínu. Hér er Víkingur Atli 1 mánaða. Embossaði á myndina, fékk lánað hjá Erlu Rún og svo var bara að bæta við. Þetta tókst allt saman á endanum og ég er nokkuð ánægð með hana.

Annar í hvítasunnu

2007-05-28T13:01:00.000Z

Fékk að sofa aðeins út í morgun. Vaknaði svo við hlátur í þeim feðgum frammi í stofu. Víkingur er reyndar með smá hita, sennilega tanntaka. Allavegana vona ég að hann sé ekki að veikjast neitt mikið. Erum búin með veikindin í bili.

Vonandi get ég sest niður í dag og skrappað 1-2 síður. Prentaði út helling af skissum í gær þannig að ég ætti að fá einhverja hugmynd hvernig ég vil hafa síðurnar mínar.